Alp Matten

Am Zyschtig 11. Juli 2023 wirds gäge die zähne eng zum Parkiere ufem Viehschouplatz ds’Reutige. Zum Glück empfiut der Martin Meier für d’Fahrt uf d’Alp Matten d’Outo ds füue damit mir bim ueche fahre die gebührepflichtegi Strass nid übermässig beanspruche u mir für jedes Fahrzüg dobe es Parkplätzli finge. Zur Vorböigig vore Mangulag bim ds’Mittag geit üsi umsichtegi Organisatorin Elsbeth Bütikofer zusätzlech Brot zum Zmittag ga poschte u het für hüt mit em Petrus abgmach d Sunne gratis la ds schyne.

Wo d Outo parkiert sy dörfe mir die wunderbari Ussicht ufe Thuner u Brienzersee sowie ds’Aupepanorama bestuhne u derna zfryde a de Tische Platz nä. Zur Eröffnig dankt üse Presi Martin für d’Gaschtfründschaft vo Sandra u Samuel Fahrni u seit ds’Ässe u ds’Trinke wärdi vom üsem bewährte Kassier Sami Santschi zaut u ds’Kaffi spändi Fahrnis.

Früsch u keck steut üs d’Sandra ihre Betrieb vor u wie froh sy sig, dass sy hie syt 5 Jahr im Summer mit ihrne rund 30 Küh u Jungveh uf die Aup dörfe cho. Wiu sy hätte im Taubetrieb Buehlimoos ds’Gasu mit 15 ha nid gnue Fuetter für au ihrer Tier. Erfröit sygi sy über e nöi Loufstau wo d’Arbeit wäsentlich erlichteri u im aute Chüestau wärdi ab morn e Chäserei bout damit sy i Zuekunft nüme ir Chuchi müess chäse. Dernäbe wärde no i 3 Hütte insgesamt 185 Gusti gsümmeret. Für die spontani Ungerstützig vo de 3 flotte Häuferinne, de Ching Anina u Aline sowie em Sämu für ds’häuffe bim bewirte vo öich Ehemalige dankt üsi Gastgäbere härzlech. Zudäm rühmt d’Sandra die gueti Zämearbeit mit der Aupgnosseschaft Bollige wo hüt düre Markus Schneider verträte wird u dankt ihm bsungerbar für sy Ysatz wo är für d’Aliege vor Äuplerfamile.leistet.

Yleitend verdankt Markus die lobende Wort vor Sandra u isch froh sone aktivi Äuplerfamile ds’ha wo vorzüglech zu de Tier, er Aup u de Gebäude luegt. Es sig ja nid säubverständlich, dass d’Gusti jede Tag gstauet u abunge wärdi u vorauem im Frühlig syg das nid immer eifach bis jedes a sym Platz syg. Är isch froh, dass syner Vorfahre die Aupstrass boue hei wiu süsch wär der Neubou vo Loufstau für d’Chüe nid müglech gsy oder sicher viu türer worde. Die Aup umfasst insgesamt 130 ha wovon uf 90 ha Gras wachst u uf 20 ha Waud isch, ufem Räste Steine fingsch. Für Pfleg vo de Aupweide sorget uf de Chüeweide d’Hirtfamilie u die rästlechi Flächi wird vo de Aupgnosseschafter im Tagwärch pflegt. Wiu geng weniger aktivi Gnosseschafter sy wird es geng wie schwieriger gnüegend Lüt für Pfleg vo de Aupweide ds’finge.
Glücklecherwys isch d’Versorgig mit Wasser dür die eigete Queue hie obe so guet, dass si no ere Nachbarsaupe chöi Wasser abgä.

Nach em Gniesse vor servierte Hamme u Härdöpfusalat wärde mir nach eme Verdouigsmärschli no mit Meränge u früscher Nidle, eme Kafi fründlech verwöhnt.
Vor der Taufahrt dörfe mir üs no im Chäschäuer mit perfekt härgscheutem u günstigem Geissechäs, Mutschli u fährnderige Aupchäs ydecke.
Nach em ustusche vo üsne Läbes- u Lydensgschichte u de luschtige Sache womer ufem Schwang hei dörfe erläbe gö die 100 guet glunte Gescht (Rekordteilnahm) zfride uf e Heiwäg u wärde däne daheime verzeue was si hüt verpasst hei.

Werner Spycher